ՊԱՐԱԴԻԳՄ
05 Jul 2018

Դատաիրավական համակարգը պատրաստ չէ ներդրումների խրախուսմանը. Միսակ Թեբելեկյան

Ներդրումային դաշտը բարելավելու գլխավոր նախապայմանը դատաիրավական պաշտպանված մթնոլորտ ստեղծելն է. ամերիկահայ գործարար


Նոր իրողություններ, նոր կառավարություն, ներդրումային դաշտը բարելավելու նոր հավակնություններ: Չնայած նոր իրողությունների, նոր Հայաստանում, սակայն, խնդիրները հին են: Այս համատեքստում էլ Շինարարատեխնիկական գիտությունների դոկտոր, ամերիկահայ գործարար Միսակ Թեբելեկյանը ցավով արձանագրում է՝ վերադառնալու եւ նեդրումներ անելու համար վստահություն չկա: «Դատական համակարգը գտնվում է նույն վիճակում: Կա օրենսգրքի փոփոխության անհրաժեշտություն, օրենսգրքի որոշ հոդվածներ շատ են խոչընդոտում ներդրում անելուն: Կցանկանայի, որ այդ հին կադրերը, հին ձեւով մտածող կադրերը, ի վերջո, փոխվեին: Մեր հարեւան Վրաստանը, օրինակ, շատ արագ կերպով լուծեց այդ հարցը»,-ընդգծում է գործարարը:

Միսակ Թեբելեկյանը նշում է, որ ցանկացած ներդրող պետք է պաշտպանված լինի, նա պետք է իմանա, որ իր շահը նվազագույնն ապահովված է: «Ինչ տեսնում ենք այսօր, չի նպաստում դրան: Նոր օրենսգրքով եւ նոր դատավորներով, դատախազներով պետք է կարողանայինք նպաստել մեր երկրի ներդրումային դաշտի բարելավմանը»,-նկատում է նա: Ներդրումային դաշտը բարելավելու ամենակարեւոր նախապայմանը, ըստ Թեբելեկյանի, դատաիրավական պաշտպանված մթնոլորտ ստեղծելն է:

Ամերիկահայ գործարարը վստահեցնում է, որ ինքը եկել է հայրենասիրական մղումներից ելնելով, սակայն դա բիզնես անելու ձեւ չէ: «Իսկ եթե պայմաններ լինեն, ճիշտ մթնոլորտ լինի, հավանաբար շատ հայեր կգան, օտարազգիներին եւս պետք է քաջալերել: Մենք մեծ հնարավորություններ ունենք, հատկապես մեր ՏՏ ոլորտի հնարավորությունը շատ մեծ է: Սիլիկոնային հովտում ունենք մեծ մասնագետներ: «Թումո» ունենք, որն անգամ Եվրոպայում են ուզում կրկնօրինակել: Մեր այսօրվա երիտասարդներն ունակ են եւ խելացի, եւ մենք կարող ենք ունենալ մեծ զարգացումներ»,-շեշտում է գործարարը: Զրույցի մանրամասները՝ «Պարադիգմ»-ում: