«ՌԴ-ն աշխատում է «3+3» հարթակը լիարժեք կազմակերպության վերածելու ուղղությամբ»․ Գալուզին

Ռուսաստանն աշխատում է Հարավային Կովկասի «3+3» հարթակը վերածել լիարժեք կազմակերպության։ Այս մասին, ТАСС-ի փոխանցմամբ, հայտարարել է ՌԴ փոխարտգործնախարար Միխայիլ Գալուզինը «Ռուսաստան-Հայաստան» երկրորդ հանրային ֆորումում։

«Տարածաշրջանի բոլոր երկրների շահերի ներդաշնակեցման գործում կարևոր տեղ ենք հատկացնում «3+3» տարածաշրջանային համագործակցության հարթակին։ Մենք աշխատում ենք այն վերածելու Հարավային Կովկասում փոխգործակցության լիարժեք կազմակերպության»,- ասաց փոխնախարարը։

Գալուզինը նշել է, որ Մոսկվան, «ինչպես նախկինում, չի խուսափում իր բոլոր ուղիներով նպաստել հայ-ադրբեջանական հարաբերությունների կարգավորմանը»։ Հարավային Կովկասում համագործակցության վեցակողմ ձևաչափի նախաձեռնությունը սկսվել է 2020 թվականի վերջին՝ Ադրբեջանի և Թուրքիայի առաջնորդներ Իլհամ Ալիևի և Ռեջեփ Թայիփ Էրդողանի կողմից, այն հետագայում անվանվել է «3+3»: 

Ռուսաստանը և Իրանը ողջունեցին այս գաղափարը, և Հայաստանը նույնպես միացավ այդ ձևաչափին։ Վրաստանը հայտարարել է, որ չի նախատեսում մասնակցել նախաձեռնությանը։ 2021 թվականի դեկտեմբերի 10-ին Մոսկվայում տեղի ունեցավ հինգ երկրների արտաքին գործերի փոխնախարարների մակարդակով խորհրդատվական տարածաշրջանային հարթակի առաջին հանդիպումը։

Փոխանցում է Yerkir.am-ը