Այլընտրանք չկա. դատական համակարգը պետք է վերից վար փոխել. Նորայր Նորիկյան
Դատական իշխանությունը երկրի զարգացման ամենակարեւոր առանցքում է, հետեւաբար՝ եթե չունենանք անկախ դատական իշխանություն, որն իրականացնի արդարադատություն, ապա միլիարդավոր ներդրումներ էլ գան Հայաստան, միեւնույն է՝ երկիրը որեւէ հեռանկար չի ունենա: «Չորս չէ, ութ միլիոնն էլ դառնանք, ոչինչ չի փոխվելու, եթե դատական համակարգն անկախ չլինի»,-վստահ է փաստաբան Նորայր Նորիկյանը:
Նա նկատում է՝ այժմ ապրում ենք մի դրամատիկ ժամանակաշրջանում, որտեղ դատական համակարգը հայտնվել է «ցուգցվանգային» իրավիճակում: «Ես համոզված կարող եմ արձանագրել, որ չենք ունեցել դատական անկախ իշխանություն. կարեւորագույն գործերով դատական իշխանության կառկառուն ներկայացուցիչներն ակնկալել են գործադիր իշխանությունից համապատասխան ցուցում՝ «արդարադատություն» իրականացնելու համար»,-նշում է նա:
Նորիկյանը նաեւ ընդգծում է՝ եթե, իրոք, հռչակել ենք նոր իդեալներ եւ ցանկանում ենք հիմնովի փոխել երկրի զարգացման հունը, ապա առաջին պլան պետք է մղվի դատաիրավական համակարգի արմատական փոփոխությունը: «Այլընտրանք պարզապես չունենք. այդ փոփոխությունները ենթադրում են վերից վար, ուղղահայաց փոփոխություններ՝ սկսած ԲԴԽ-ից վերջացրած դատարաններով: Հատակին հայտնված հեղինակությունը պետք է բարձրացնել»,-շեշտում է նա:
Հին ու նոր իրողությունները համեմատելիս՝ Նորիկյանն օրինակ է բերում դատախազության հայտարարությունը՝ «եկեք, գործակցենք, նոր ցուցումներ ենք տվել վարույթ իրականացնող մարմիններին»: «Եթե երեք ամիս առաջ սկզբունքային այլ դիրքորոշում ունեիք, նոր իրողություններով պայմանավորված բոլորովին այլ դիրքորոշում, արդյոք բարոյակա՞ն է, որ մնաք ձեր տեղերում: Որեւէ մեկը բացառո՞ւմ է, որ վաղն այդ նույն մարդիկ քաղաքական իրողությամբ պայմանավորված արմատապես չեն փոխի իրենց դիրքորոշումը»,-նկատում է փաստաբանը: Ի՞նչ անել՝ Նորիկյանի խորհուրդներն ու տեսակետները՝ «Պարադիգմ» հաղորդման մեջ:
